IMPLACABILES

IMPLACABILES

dicuntur Forbes. Haeretici, qui, peccatum agnoscentes, eius irremissibilitatem atrociter exaggerabant, hocque praetextu pacem Ecclesiasticam paenitentibus negabant. In qua clasle primi fuêrunt, qui Montanistae, ab haereseos auctore Montano, Cataphryges, a prov. Phrygia, unde is prodit, et a Pepuza, civ. Phrygiae, Pepuziani, dicti sunt; de quibus Hier. Ep. ad Marcellam, Illi, ait, ad omne pene delictum Eccl. obserant fores, nos quottidie legimus, Malo paenitentiam peccatoris, quam mortem. Eorum errorem arripuêre postea Novatiani, qui lapsos in persequutione Deciana non admittebant ad paenitentiam, nec paenitentes ad pacem et communionem, uti legimus apud Cyprian. Ep. 49 et 52. alibi. Meletiani item, quos noluisse orare cum conversis, Augustin. refert Haer. 48. Porro Apotactici, s. Apostolici, ut se ipsos arroganter vocabant, apud quos nullam lapsorum susceptionem fuisle scribit Epiphan. Haer. 61. Luciferiani quoque, quoad Episcopos saltem et Clericos lapsos, quos in suis gradibus non esse recipiendos, sed ad laicalem tantum, uti vocabant, communionem, admittendos, sentientes; abstinebant a communione eorum, qui illos post paenitentiam sie recipiebant, ut eos sinerent permanere Episcopos et retinere pristinum gradum in Clero, vide Augustin. Har. 81. etc. plura vero hanc in rem, apud Ioh. Forbes. Instruct. Hist. Theol. l. XII. c. 10.